ಕಟಾಕ್ಶ ಶಟಕಮ್
ಮೋಹಾನ್ಧಕಾರನಿವಹಂ
ವಿನಿಹನ್ತುಮೀಡೇ
ಮೂಕಾತ್ಮನಾಮಪಿ
ಮಹಾಕವಿತಾವದಾನ್ಯಾತ್ |
ಶ್ರೀಕಾಞ್ಚಿದೇಶಶಿಶಿರೀಕೃತಿಜಾಗರೂಕಾ-
ನೇಕಾಮ್ರನಾಥತರುಣೀಕರುಣಾವಲೋಕಾನ್ --1
ಮಾತರ್ಜಯನ್ತಿ
ಮಮತಾಗ್ರಹಮೋಕ್ಷಣಾನಿ
ಮಾಹೇನ್ದ್ರನೀಲರುಚಿಶಿಕ್ಷಣದೀಕ್ಷಣಾನಿ|
ಕಾಮಾಕ್ಷಿ ಕಲ್ಪಿತಜಗತ್ತ್ರಯರಕ್ಷಣಾನಿ
ತ್ವದ್ವೀಕ್ಷಣಾನಿ
ವರದಾನವಿಚಕ್ಷಣಾನಿ --2
ಆನಙ್ಗತನ್ತ್ರವಿಧಿದರ್ಶಿತಕೌಶಲಾನಾ-
ಮಾನನ್ದಮನ್ದಪರಿಘೂರ್ಣಿತಮನ್ಥರಾಣಾಮ್|
ತಾರಲ್ಯಮಂಬ
ತವ ತಾಡಿತಕರ್ಣಸೀಮ್ನಾಂ
ಕಾಮಾಕ್ಷಿ ಖೇಲತಿ
ಕಟಾಕ್ಷನಿರೀಕ್ಷಣಾನಾಮ್ --3
ಕಲ್ಲೋಲಿತೇನ
ಕರುಣಾರಸವೇಲ್ಲಿತೇನ
ಕಲ್ಮಾಷಿತೇನ
ಕಮನೀಯಮೃದುಸ್ಮಿತೇನ|
ಮಾಮಞ್ಚಿತೇನ
ತವ ಕಿಂಚನ ಕುಞ್ಚಿತೇನ
ಕಾಮಾಕ್ಷಿ ತೇನ
ಶಿಶಿರೀಕುರು ವೀಕ್ಷಿತೇನ --4
ಸಾಹಾಯ್ಯಕಂ
ಗತವತೀ ಮುಹುರರ್ಜುನಸ್ಯ
ಮನ್ದಸ್ಮಿತಸ್ಯ
ಪರಿತೋಷಿತಭೀಮಚೇತಾಃ|
ಕಾಮಾಕ್ಷಿ ಪಾಣ್ಡವಚಮೂರಿವ
ತಾವಕೀನಾ
ಕರ್ಣಾನ್ತಿಕಂ
ಚಲತಿ ಹನ್ತ ಕಟಾಕ್ಷಲಕ್ಷ್ಮೀಃ --5
ಅಸ್ತಂ ಕ್ಷಣಾನ್ನಯತು
ಮೇ ಪರಿತಾಪಸೂರ್ಯ-
ಮಾನನ್ದಚನ್ದ್ರಮಸಮಾನಯತಾಂ
ಪ್ರಕಾಶಮ್ |
ಕಾಲಾನ್ಧಕಾರಸುಷಮಾಂ
ಕಲಯನ್ದಿಗನ್ತೇ
ಕಾಮಾಕ್ಷಿ ಕೋಮಲಕಟಾಕ್ಷನಿಶಾಗಮಸ್ತೇ --6
ತಾಟಙ್ಕ ಮೌಕ್ತಿಕರುಚಾಂಕುರದನ್ತಕಾನ್ತಿ:
ಕಾರುಣ್ಯಹಸ್ತಿಪಶಿಖಾಮಣಿನಾಧಿರೂಢಾ|
ಉನ್ಮೂಲಯತ್ವಶುಭಪಾದಪಮಸ್ಮದೀಯಂ
ಕಾಮಾಕ್ಷಿ ತಾವಕ
ಕಟಾಕ್ಷಮತಙ್ಗಜೇನ್ದ್ರ: --7
ಚ್ಛಾಯಾಭರೇಣ
ಜಗತಾಂ ಪರಿತಾಪಹಾರೀ
ತಾಟ್ಙ್ಕರತ್ನಮಣಿತಲ್ಲಜಪಲ್ಲವಶ್ರೀಃ|
ಕಾರುಣ್ಯನಾಮ
ವಿಕಿರನ್ಮಕರನ್ದಜಾಲಂ
ಕಾಮಾಕ್ಷಿ ರಾಜತಿ
ಕಟಾಕ್ಷಸುರದ್ರುಮಸ್ತೇ --8
ಸೂರ್ಯಾಶ್ರಯಪ್ರಣಯಿನೀ
ಮಣಿಕುಣ್ಡಲಾಂಶು-
ಲೌಹಿತ್ಯಕೋಕನದಕಾನನಮಾನನೀಯಾ|
ಯಾನ್ತೀ ತವ
ಸ್ಮರಹರಾನನಕಾನ್ತಿಸಿನ್ಧುಂ
ಕಾಮಾಕ್ಷಿ ರಾಜತಿ
ಕಟಾಕ್ಷಕಲಿನ್ದಕನ್ಯಾ --9
ಪ್ರಾಪ್ನೋತಿ
ಯಂ ಸುಕೃತಿನಂ ತವ ಪಕ್ಷಪಾತಾ-
ತ್ಕಾಮಾಕ್ಷಿ
ವೀಕ್ಷಣವಿಲಾಸಕಲಾಪುರನ್ಧ್ರೀ
ಸದ್ಯಸ್ತಮೇವ
ಕಿಲ ಮುಕ್ತಿವಧೂರ್ವೃಣೀತೇ
ತಸ್ಮಾನ್ನಿತಾನ್ತಮನಯೋರಿದಮೈಕಮತ್ಯಮ್ --10
ಯಾನ್ತೀ ಸದೈವ
ಮರುತಾಮನುಕೂಲಭಾವಂ
ಭ್ರೂವಲ್ಲಿಶಕ್ರಧನುರುಲ್ಲಸಿತಾ
ರಸಾರ್ದ್ರಾ |
ಕಾಮಾಕ್ಷಿ ಕೌತುಕತರಙ್ಗಿತನೀಲಕಣ್ಠಾ
ಕಾದಮ್ಬಿನೀವ
ತವ ಭಾತಿ ಕಟಾಕ್ಷಮಾಲಾ --11
ಗಂಗಾಮ್ಭಸಿ
ಸ್ಮಿತಮಯೇ ತಪನಾತ್ಮಜೇವ
ಗಂಗಾಧರೋರಸಿ
ನವೋತ್ಪಲಮಾಲಿಕೇವ|
ವಕ್ತ್ರಪ್ರಭಾಸರಸಿ
ಶೈವಲಮಣ್ಡಲೀವ
ಕಾಮಾಕ್ಷಿ ರಾಜತಿ
ಕಟಾಕ್ಷರುಚಿಚ್ಛ್ಟಾ ತೇ --12
ಸಂಸ್ಕಾರತಃ
ಕಿಮಪಿ ಕನ್ದಲಿತಾನ್ ರಸಜ್ಞ-
ಕೇದಾರಸೀಮ್ನಿ
ಸುಧಿಯಾಮುಪಭೋಗಭಾಗ್ಯಾನ್|
ಕಲ್ಯಾಣಸೂಕ್ತಿಲಹರೀಕಲಮಾಂಕುರಾನ್ನಃ
ಕಾಮಾಕ್ಷಿ ಕನ್ದಲಯತು
ತ್ವದಪಾಙ್ಗಮೇಘಃ --13
ಚಾಞ್ಚಲ್ಯಮೇವ
ನಿಯತಂ ಕಲಯನ್ಪ್ರಕೃತ್ಯಾ
ಮಾಲಿನ್ಯಭೂಃ
ಶ್ರುತಿಪಥಾಕ್ರಮಜಾಗರೂಕಃ|
ಕೈವಲ್ಯಮೇವ
ಕಿಮು ಕಲ್ಪಯತೇ ನತಾನಾಂ
ಕಾಮಾಕ್ಷಿ ಚಿತ್ರಮಪಿ
ತೇ ಕರುಣಾಕಟಾಕ್ಷಃ --14
ಸಂಜೀವನೇ ಜನನಿ
ಚೂತಶಿಲೀಮುಖಸ್ಯ
ಸಂಮೋಹನೇ ಶಶಿಕಿಶೋರಕಶೇಖರಸ್ಯ|
ಸಂಸ್ತಮ್ಭನೇ
ಚ ಮಮತಾಗ್ರಹಚೇಷ್ಟಿತಸ್ಯ
ಕಾಮಾಕ್ಷಿ ವೀಕ್ಷಣಕಲಾ
ಪರಮೌಷಧಂ ತೇ --15
ನೀಲೋಽಪಿ ರಾಗಮಧಿಕಂ
ಜನಯನ್ಮುರಾರೇ-
ರ್ಲೋಲೋಽಪಿ
ಭಕ್ತಿಮಧಿಕಾಂ ದ್ರಢಯನ್ನರಾಣಾಮ್|
ವಕ್ರೋಽಪಿ ದೇವಿ
ನಮತಾಂ ಸಮತಾಂ ವಿತನ್ವ-
ನ್ಕಾಮಾಕ್ಷಿ
ನೃತ್ಯತು ಮಯಿ ತ್ವದಪಾಙ್ಗಪಾತಃ --16
ಕಾಮದ್ರುಹೋ
ಹೃದಯಯನ್ತ್ರಣಜಾಗರೂಕಾ
ಕಾಮಾಕ್ಷಿ ಚಞ್ಚಲದೃಗಞ್ಚಲಮೇಖಲಾ
ತೇ|
ಆಶ್ಚರ್ಯಮಮ್ಬ
ಭಜತಾಂ ಝಟಿತಿ ಸ್ವಕೀಯ
ಸಂಪರ್ಕ ಏವ
ವಿಧುನೋತಿ ಸಮಸ್ತಬನ್ಧಾನ್ --17
ಕುಣ್ಠೀಕರೋತು
ವಿಪದಂ ಮಮ ಕುಞ್ಚಿತಭ್ರೂ-
ಚಾಪಾನ್ವಿತಃ
ಶ್ರಿತವಿದೇಹಭವಾನುರಾಗಃ|
ರಕ್ಷೋಪಕಾರಮನಿಶಂ
ಜನಯಞ್ಜಗತ್ಯಾಂ
ಕಾಮಾಕ್ಷಿ ರಾಮ
ಇವ ತೇ ಕರುಣಾಕಟಾಕ್ಷಃ --18
ಶ್ರೀಕಾಮಕೊಟಿ
ಶಿವಲೋಚನಶೋಷಿತಸ್ಯ
ಶೃಙ್ಗಾರಬೀಜವಿಭವಸ್ಯ
ಪುನಃ ಪ್ರರೋಹೇ|
ಪ್ರೇಮಾಮ್ಭಸಾರ್ದ್ರಮಚಿರಾತ್ಪ್ರಚುರೇಣ
ಶಙ್ಕೇ
ಕೇದಾರಮಮ್ಬ
ತವ ಕೇವಲದೃಷ್ಟಿಪಾತಮ್ --19
ಮಾಹಾತ್ಮ್ಯಶೇವಧಿರಸೌ
ತವ ದುರ್ವಿಲಙ್ಘ್ಯ-
ಸಂಸಾರವಿನ್ಧ್ಯಗಿರಿಕುಣ್ಠನಕೇಲಿಚುಞ್ಚುಃ|
ಧೈರ್ಯಾಮ್ಬುಧಿಂ
ಪಶುಪತೇಶ್ಚುಲಕೀಕರೋತಿ
ಕಾಮಾಕ್ಷಿ ವೀಕ್ಷಣವಿಜೃಮ್ಭಣಕುಮ್ಭಜನ್ಮಾ --20
ಪೀಯೂಷವರ್ಷಶಿಶಿರಾ
ಸ್ಫುಟದುತ್ಪಲಶ್ರೀ-
ರ್ಮೈತ್ರೀ ನಿಸರ್ಗಮಧುರಾ
ಕೃತತಾರಕಾಪ್ತಿಃ|
ಕಾಮಾಕ್ಷಿ ಸಂಶ್ರಿತವತೀ
ವಪುರಷ್ಟಮೂರ್ತೇ-
ರ್ಜ್ಯೋತ್ಸ್ನಾಯತೇ
ಭಗವತಿ ತ್ವದಪಾಙ್ಗಮಾಲಾ --21
ಅಮ್ಬ ಸ್ಮರಪ್ರತಿಭಟಸ್ಯ
ವಪುರ್ಮನೋಜ್ಞ-
ಮಮ್ಭೋಜಕಾನನಮಿವಾಞ್ಚಿತಕಣ್ಟಕಾಭಮ್|
ಭೃಙ್ಗೀವ ಚುಮ್ಬತಿ
ಸದೈವ ಸಪಕ್ಷಪಾತಾ
ಕಾಮಾಕ್ಷಿ ಕೋಮಲರುಚಿಸ್ತ್ವದಪಾಙ್ಗಮಾಲಾ --22
ಕೇಶಪ್ರಭಾಪಟಲನೀಲವಿತಾನಜಾಲೇ
ಕಾಮಾಕ್ಷಿ ಕುಣ್ಡಲಮಣಿಚ್ಛವಿದೀಪಶೋಭೇ|
ಕಮ್ರೇ ಕಟಾಕ್ಷರುಚಿರಂಗತಲೇ
ಕೃಪಾಖ್ಯಾ
ಶೈಲೂಷಕೀ ನಟತಿ
ಶಂಕರವಲ್ಲಭೇ ತೇ --23
ಅತ್ಯನ್ತಶೀತಲಮತನ್ದ್ರಯತು
ಕ್ಷಣಾರ್ಧ-
ಮಸ್ತೋಕವಿಭ್ರಮಮನಙ್ಗವಿಲಾಸಕನ್ದಮ್|
ಅಲ್ಪಸ್ಮಿತಾದೃತಮಪಾರಕೃಪಾಪ್ರವಾಹ-
ಮಕ್ಷಿಪ್ರರೋಹಮಚಿರಾನ್ಮಯಿ
ಕಾಮಕೊಟಿ --24
ಮನ್ದಾಕ್ಷರಾಗತರಲೀಕೃತಿತಾರತಮ್ಯಾ-
ತ್ಕಾಮಾಕ್ಷಿ
ಮನ್ಥರತರಾಂ ತ್ವದಪಾಙ್ಗದೋಲಾಮ್|
ಆರುಹ್ಯ ಮನ್ದಮತಿಕೌತುಕಶಾಲಿ
ಚಕ್ಷು-
ರಾನನ್ದಮೇತಿ
ಮುಹುರರ್ಧಶಶಾಙ್ಕಮೌಲೇಃ --25
ತ್ರೈಯಮ್ಬಕಂ
ತ್ರಿಪುರಸುನ್ದರಿ ಹರ್ಮ್ಯಭೂಮಿ-
ರಙ್ಗಂ ವಿಹಾರಸರಸೀ
ಕರುಣಾಪ್ರವಾಹಃ
ದಾಸಾಶ್ಚ ವಾಸವಮುಖಾಃ
ಪರಿಪಾಲನೀಯಂ
ಕಾಮಾಕ್ಷಿ ವಿಶ್ವಮಪಿ
ವೀಕ್ಷಣಭೂಭೃತಸ್ತೇ --26
ವಾಗೀಶ್ವರೀ
ಸಹಚರೀ ನಿಯಮೇನ ಲಕ್ಷ್ಮೀ-
ರ್ಭ್ರೂವಲ್ಲರೀವಶಕರೀ
ಭುವನಾನಿ ಗೇಹಮ್|
ರೂಪಂ ತ್ರಿಲೋಕನಯನಾಮೃತಮಮ್ಬ
ತೇಷಾಂ
ಕಾಮಾಕ್ಷಿ ಯೇಷು
ತವ ವೀಕ್ಷಣಪಾರತನ್ತ್ರೀ --27
ಮಾಹೇಶ್ವರಂ
ಝಟಿತಿ ಮಾನಸಮೀನಮಮ್ಬ
ಕಾಮಾಕ್ಷಿ ಧೈರ್ಯಜಲಧೌ
ನಿತರಾಂ ನಿಮಗ್ನಮ್|
ಜಾಲೇನ ಶೃಙ್ಖಲಯತಿ
ತ್ವದ್ಪಾಙ್ಗನಾಮ್ನಾ
ವಿಸ್ತಾರಿತೇನ
ವಿಷಮಾಯುಧದಾಶಕೋಽಸೌ --28
ಉನ್ಮಥ್ಯ ಬೋಧಕಮಲಾಕರಮಮ್ಬ
ಜಾಡ್ಯ-
ಸ್ತಮ್ಬೇರಮಂ
ಮಮ ಮನೋವಿಪಿನೇ ಭ್ರಮನ್ತಮ್|
ಕುಣ್ಠೀಕುರುಷ್ವ
ತರಸಾ ಕುಟಿಲಾಗ್ರಸೀಮ್ನಾ
ಕಾಮಾಕ್ಷಿ ತಾವಕಕಟಾಕ್ಷಮಹಾಙ್ಕುಶೇನ --29
ಉದ್ವೇಲ್ಲಿತಸ್ತಬಕಿತೈರ್ಲಲಿತೈರ್ವಿಲಾಸೈ-
ರುತ್ಥಾಯ ದೇವಿ
ತವ ಗಾಢಕಟಾಕ್ಷಕುಞ್ಜಾತ್|
ದೂರಂ ಪಲಾಯತು
ಮೋಹಮೃಗೀಕುಲಂ ಮೇ
ಕಾಮಾಕ್ಷಿ ಸತ್ವರಮನುಗ್ರಹಕೇಸರೀನ್ದ್ರಃ --30
ಸ್ನೇಹಾದೃತಾಂ
ವಿದಲಿತೋತ್ಪಲಕಾನ್ತಿಚೋರಾಂ
ಜೇತಾರಮೇವ ಜಗದೀಶ್ವರಿ
ಜೇತುಕಾಮಃ |
ಮಾನೋದ್ಧತೋ
ಮಕರಕೇತುರಸೌ ಧುನೀತೇ
ಕಾಮಾಕ್ಷಿ ತಾವಕಕಟಾಕ್ಷಕೃಪಾಣವಲ್ಲೀಮ್ --31
ಶ್ರೌತೀಂ ವ್ರಜನ್ನಪಿ
ಸದಾ ಸರಣಿಂ ಮುನೀನಾಂ
ಕಾಮಾಕ್ಷಿ ಸನ್ತತಮಪಿ
ಸ್ಮೃತಿಮಾರ್ಗಗಾಮೀ|
ಕೌಟಿಲ್ಯಮಮ್ಬ
ಕಥಮಸ್ಥಿರತಾಂ ಚ ಧತ್ತೇ
ಚೌರ್ಯಂ ಚ ಪಙ್ಕಜರುಚಾಂ
ತ್ವದಪಾಙ್ಗಪಾತಃ --32
ನಿತ್ಯಂ ಶ್ರುತೇಃ
ಪರಿಚಿತೌ ಯತಮಾನಮೇವ
ನೀಲೋತ್ಪಲಂ
ನಿಜಸಮೀಪನಿವಾಸಲೋಲಮ್|
ಪ್ರೀತ್ಯೈವ
ಪಾಠಯತಿ ವೀಕ್ಷಣದೇಶಿಕೇನ್ದ್ರಃ
ಕಾಮಾಕ್ಷಿ ಕಿಂ
ನು ತವ ಕಾಲಿಮಸಂಪ್ರದಾಯಮ್ --33
ಭ್ರಾನ್ತ್ವಾ
ಮುಹುಃ ಸ್ತಬಕಿತಸ್ಮಿತಫೇನರಾಶೌ
ಕಾಮಾಕ್ಷಿ ವಕ್ತ್ರರುಚಿಸಞ್ಚಯವಾರಿರಾಶೌ|
ಆನನ್ದತಿ ತ್ರಿಪುರಮರ್ದನನೇತ್ರ್ಲಕ್ಷ್ಮೀ-
ರಾಲಮ್ಬ್ಯ ದೇವಿ ತವ ಮನ್ದಮಪಾಙ್ಗಸೇತುಮ್ --34
ಶ್ಯಾಮಾ ತವ
ತ್ರಿಪುರಸುನ್ದರಿ ಲೋಚನಶ್ರೀ:
ಕಾಮಾಕ್ಷಿ ಕನ್ದಲಿತಮೇದುರತಾರಕಾನ್ತಿಃ|
ಜ್ಯೋತ್ಸ್ನಾವತೀ
ಸ್ಮಿತರುಚಾಪಿ ಕಥಂ ತನೋತಿ
ಸ್ಪರ್ಧಾಮಹೋ
ಕುವಲಯೈಶ್ಚ ತಥಾ ಚಕೋರೈಃ --35
ಕಾಲಾಞ್ಜನಂ
ಚ ತವ ದೇವಿ ನಿರೀಕ್ಷಣಂ ಚ
ಕಾಮಾಕ್ಷಿ ಸಾಮ್ಯಸರಣಿಂ
ಸಮುಪೈತಿ ಕಾನ್ತ್ಯಾ |
ನಿಃಶೇಷನೇತ್ರಸುಲಭಂ
ಜಗತೀಷು ಪೂರ್ವ-
ಮನ್ಯತ್ತ್ರಿನೇತ್ರಸುಲಭಂ
ತುಹಿನಾದ್ರಿಕನ್ಯೇ --36
ಧೂಮಾಙ್ಕುರೋ
ಮಕರಕೇತನಪಾವಕಸ್ಯ
ಕಾಮಾಕ್ಷಿ ನೇತ್ರರುಚಿನೀಲಿಮಚಾತುರೀ
ತೇ|
ಅತ್ಯನ್ತಮದ್ಭುತಮಿದಂ
ನಯನತ್ರಯಸ್ಯ
ಹರ್ಷೋದಯಂ ಜನಯತೇ
ಹರಿಣಾಙ್ಕಮೌಲೇಃ --37
ಆರಮ್ಭಲೇಶಸಮಯೇ
ತವ ವೀಕ್ಷಣಸ್ಯ
ಕಾಮಾಕ್ಷಿ ಮೂಕಮಪಿ
ವೀಕ್ಷಣಮಾತ್ರನಮ್ರಮ್|
ಸರ್ವಜ್ಞತಾ
ಸಕಲಲೋಕಸಮಕ್ಷಮೇವ
ಕೀರ್ತಿಃ ಸ್ವಯಂವರಣಮಾಲ್ಯವತೀ
ವೃಣೀತೇ --38
ಕಾಲಾಮ್ಬುವಾಹ ಇವ ತೇ ಪರಿತಾಪಹಾರೀ
ಕಾಮಾಕ್ಷಿ ಪುಷ್ಕರಮಧಃ
ಕುರುತೇ ಕಟಾಕ್ಷಃ|
ಪೂರ್ವಃ ಪರಂ
ಕ್ಷಣರುಚಾ ಸಮುಪೈತಿ ಮೈತ್ರೀ-
ಮನ್ಯಸ್ತು ಸನ್ತತರುಚಿಂ
ಪ್ರಕಟೀಕರೋತಿ --39
ಸೂಕ್ಷ್ಮೇಽಪಿ
ದುರ್ಗಮತರೇಽಪಿ ಗುರುಪ್ರಸಾದ-
ಸಾಹಾಯ್ಯಕೇನ
ವಿಚರನ್ನಪವರ್ಗಮಾರ್ಗೇ|
ಸಂಸಾರಪಙ್ಕನಿಚಯೇ
ನ ಪತತ್ಯಮುಂ ತೇ
ಕಾಮಾಕ್ಷಿ ಗಾಢಮವಲಮ್ಬ್ಯ
ಕಟಾಕ್ಷಯಷ್ಟಿಮ್ --40
ಕಾಮಾಕ್ಷಿ ಸಂತತಮಸೌ
ಹರಿನೀಲರತ್ನ-
ಸ್ತಮ್ಭೇ ಕಟಾಕ್ಷರುಚಿಪುಞ್ಜಮಯೇ
ಭವತ್ಯಾಃ |
ಬದ್ಧೋಽಪಿ ಭಕ್ತಿನಿಗಲೈರ್ಮಮ
ಚಿತ್ತಹಸ್ತೀ
ಸ್ತಂಭಂ ಚ ಬನ್ಧಮಪಿ
ಮುಞ್ಚತಿ ಹನ್ತ ಚಿತ್ರಮ್ --41
ಕಾಮಾಕ್ಷಿ ಕಾರ್ಷ್ಣ್ಯಮಪಿ
ಸಂತತಮಞ್ಜನಂ ಚ
ಬಿಭ್ರನ್ನಿಸರ್ಗತರಲೋಽಪಿ
ಭವತ್ಕಟಾಕ್ಷಃ|
ವೈಮಲ್ಯಮನ್ವಹಮನಞ್ಜನತಾಂ
ಚ ಭೂಯಃ
ಸ್ಥೈರ್ಯಂ ಚ
ಭಕ್ತಹೃದಯಾಯ ಕಥಂ ದದಾತಿ --42
ಮನ್ದಸ್ಮಿತಸ್ತಬಕಿತಂ
ಮಣಿಕುಣ್ಡಲಾಂಶು-
ಸ್ತೋಮಪ್ರವಾಲರುಚಿಂ
ಶಿಶಿರೀಕೃತಾಶಮ್
ಕಾಮಾಕ್ಷಿ ರಾಜತಿ
ಕಟಾಕ್ಷರುಚೇಃ ಕದಮ್ಬ-
ಮುದ್ಯಾನಮಮ್ಬ
ಕರುಣಾಹರಿಣೇಕ್ಷಣಾಯಾಃ --43
ಕಾಮಾಕ್ಷಿ ತಾವಕಕಟಾಕ್ಷಮಹೇನ್ದ್ರನೀಲ-
ಸಿಂಹಾಸನಂ ಶ್ರಿತವತೋ
ಮಕರಧ್ವಜಸ್ಯ|
ಸಾಮ್ರಾಜ್ಯಮಙ್ಗಲವಿಧೌ
ಮಣಿಕುಣ್ಡಲಶ್ರೀ-
ರ್ನೀರಾಜನೋತ್ಸವತರಙ್ಗಿತದೀಪಮಾಲಾ --44
ಮಾತಃ ಕ್ಷಣಂ
ಸ್ನಪಯ ಮಾಂ ತವ ವೀಕ್ಷಿತೇನ
ಮನ್ದಾಕ್ಷಿತೇನ
ಸುಜನೈರಪರೋಕ್ಷಿತೇನ|
ಕಾಮಾಕ್ಷಿ ಕರ್ಮತಿಮಿರೋತ್ಕರಭಾಸ್ಕರೇಣ
ಶ್ರೇಯಸ್ಕರೇಣ
ಮಧುಪದ್ಯುತಿತಸ್ಕರೇಣ --45
ಪ್ರೇಮಾಪಗಾಪಯಸಿ
ಮಜ್ಜನಮಾರಚಯ್ಯ
ಯುಕ್ತಃ ಸ್ಮಿತಾಂಶುಕೃತಭಸ್ಮವಿಲೇಪನೇನ
|
ಕಾಮಾಕ್ಷಿ ಕುಣ್ಡಲಮಣಿದ್ಯುತಿಭಿರ್ಜಟಾಲಃ
ಶ್ರೀಕಣ್ಠಮೇವ
ಭಜತೇ ತವ ದೃಷ್ಟಿಪಾತಃ --46
ಕೈವಲ್ಯದಾಯ
ಕರುಣಾರಸಕಿಂಕರಾಯ
ಕಾಮಾಕ್ಷಿ ಕನ್ದಲಿತವಿಭ್ರಮಶಂಕರಾಯ
ಆಲೋಕನಾಯ ತವ
ಭಕ್ತಶಿವಂಕರಾಯ
ಮಾತರ್ನಮೋಽಸ್ತು
ಪರತನ್ತ್ರಿತಶಂಕರಾಯ --47
ಸಾಮ್ರಾಜ್ಯಮಙ್ಗಲವಿಧೌ
ಮಕರಧ್ವಜಸ್ಯ
ಲೋಲಾಲಕಾಲಿಕೃತತೋರಣಮಾಲ್ಯಶೋಭೇ|
ಕಾಮೇಶ್ವರಿ
ಪ್ರಚಲದುತ್ಪಲವೈಜಯನ್ತೀ
ಚಾತುರ್ಯಮೇತಿ
ತವ ಚಞ್ಚಲದೃಷ್ಟಿಪಾತಃ --48
ಮಾರ್ಗೇಣ ಮಞ್ಜುಕಚಕಾನ್ತಿತಮೋವೃತೇನ
ಮನ್ದಾಯಮಾನಗಮನಾ
ಮದನಾತುರಾಸೌ|
ಕಾಮಾಕ್ಷಿ ದೃಷ್ಟಿರಯತೇ
ತವ ಶಂಕರಾಯ
ಸಂಕೇತಭೂಮಿಮಚಿರಾದಭಿಸಾರಿಕೇವ --49
ವ್ರೀಡಾನುವೃತ್ತಿರಮಣೀಕೃತಸಾಹಚರ್ಯಾ
ಶೈವಾಲಿತಾಂ
ಗಲರುಚಾ ಶಶಿಶೇಖರಸ್ಯ|
ಕಾಮಾಕ್ಷಿ ಕಾನ್ತಿಸರಸೀಂ
ತ್ವದಪಾಙ್ಗಲಕ್ಷ್ಮೀ-
ರ್ಮನ್ದಂ ಸಮಾಶ್ರಯತಿ
ಮಜ್ಜನಖೇಲನಾಯ --50
ಕಾಷಾಯಾಂಶುಕಮಿವ ಪ್ರಕಟಂ ದಧಾನೋ
ಮಾಣಿಕ್ಯಕುಣ್ಡಲರುಚಿಂ
ಮಮತಾವಿರೋಧೀ|
ಶ್ರುತ್ಯನ್ತಸೀಮನಿ
ರತಃ ಸುತರಾಂ ಚಕಾಸ್ತಿ
ಕಾಮಾಕ್ಷಿ ತಾವಕ ಕಟಾಕ್ಷಯತೀಶ್ವರೋಽಸೌ --51
ಪಾಷಾಣ ಏವ ಹರಿನೀಲಮಣಿರ್ದಿನೇಷು
ಪ್ರಮ್ಲಾನತಾಂ
ಕುವಲಯಂ ಪ್ರಕಟೀಕರೋತಿ|
ನೈಮಿತ್ತಿಕೋ
ಜಲದಮೇಚಕಿಮಾ ತತಸ್ತೇ
ಕಾಮಾಕ್ಷಿ ಶೂನ್ಯಮುಪಮಾನಮಪಾಙ್ಗಲಕ್ಷ್ಮ್ಯಾಃ --52
ಶೃಙ್ಗಾರವಿಭ್ರಮವತೀ ಸುತರಾಂ ಸಲಜ್ಜಾ
ನಾಸಾಗ್ರಮೌಕ್ತಿಕರುಚಾ
ಕೃತಮನ್ದಹಾಸಾ|
ಶ್ಯಾಮಾ ಕಟಾಕ್ಷಸುಷಮಾ ತವ ಯುಕ್ತಮೇತತ್-
ಕಾಮಾಕ್ಷಿ ಚುಮ್ಬತಿ ದಿಗಮ್ಬರವಕ್ತ್ರಬಿಮ್ಬಮ್ --53
ನೀಲೋತ್ಪಲೇನ
ಮಧುಪೇನ ಚ ದೃಷ್ಟಿಪಾತಃ
ಕಾಮಾಕ್ಷಿ ತುಲ್ಯ
ಇತಿ ತೇ ಕಥಮಾಮನನ್ತಿ |
ಶೈತ್ಯೇನ ನಿನ್ದತಿ
ಯದನ್ವಹಮಿನ್ದುಪಾದಾ-
ನ್ಪಾಥೋರುಹೇಣ
ಯದಸೌ ಕಲಹಾಯತೇ ಚ --54
ಒಷ್ಠಪ್ರಭಾಪಟಲವಿದ್ರುಮಮುದ್ರಿತೇ ತೇ
ಭ್ರೂವಲ್ಲಿವೀಚಿಸುಭಗೇ ಮುಖಕಾನ್ತಿಸಿನ್ಧೌ|
ಕಾಮಾಕ್ಷಿ ವಾರಿಭರಪೂರಣಲಮ್ಬಮಾನ-
ಕಾಲಾಮ್ಬುವಾಹಸರಣಿಂ
ಲಭತೇ ಕಟಾಕ್ಷಃ --55
ಮನ್ದಸ್ಮಿತೈರ್ಧವಲಿತಾ
ಮಣಿಕುಣ್ಡಲಾಂಶು-
ಸಂಪರ್ಕಲೋಹಿತರುಚಿಸ್ತ್ವದಪಾಙ್ಗಮಾಲಾ|
ಕಾಮಾಕ್ಷಿ ಮಲ್ಲಿಕುಸುಮೈರ್ನವಪಲ್ಲವೈಶ್ಚ
ನೀಲೋತ್ಪಲೈಶ್ಚ
ರಚಿತೇವ ವಿಭಾತಿ ಮಾಲಾ --56
ಕಾಮಾಕ್ಷಿ ಶೀತಲಕೃಪಾರಸನಿರ್ಝರಾಮ್ಭಃ
ಸಂಪರ್ಕಪಕ್ಷ್ಮಲರುಚಿಸ್ತ್ವದಪಾಙ್ಗಮಾಲಾ|
ಗೋಭಿಃ ಸದಾ
ಪುರರಿಪೋರಭಿಲಷ್ಯಮಾಣಾ
ದೂರ್ವಾಕದಮ್ಬಕವಿಡಮ್ಬನಮಾತನೋತಿ --57
ಹೃತ್ಪಙ್ಕಜಂ
ಮಮ ವಿಕಾಸಯತು ಪ್ರಮುಷ್ಣ-
ನ್ನುಲ್ಲಾಸಮುತ್ಪಲರುಚೇಸ್ತಮಸಾಂ
ನಿರೋದ್ಧಾ |
ದೋಷಾನುಷಙ್ಗಜಡತಾಂ ಜಗತಾಂ ಧುನಾನಃ
ಕಾಮಾಕ್ಷಿ ವೀಕ್ಷಣವಿಲಾಸದಿನೋದಯಸ್ತೇ --58
ಚಕ್ಷುರ್ವಿಮೋಹಯತಿ ಚನ್ದ್ರವಿಭೂಷಣಸ್ಯ
ಕಾಮಾಕ್ಷಿ ತಾವಕ ಕಟಾಕ್ಷತಮಃಪ್ರರೋಹಃ|
ಪ್ರತ್ಯಙ್ಮುಖಂ ತು ನಯನಂ ಸ್ತಿಮಿತಂ ಮುನೀನಾಂ
ಪ್ರಾಕಾಶ್ಯಮೇವ
ನಯತೀತಿ ಪರಂ ವಿಚಿತ್ರಮ್ --59
ಕಾಮಾಕ್ಷಿ ವೀಕ್ಷಣರುಚಾ
ಯುಧಿ ನಿರ್ಜಿತಂ ತೇ
ನೀಲೋತ್ಪಲಂ
ನಿರವಶೇಷಗತಾಭಿಮಾನಮ್|
ಆಗತ್ಯ ತತ್ಪರಿಸರಂ
ಶ್ರವಣಾವತಂಸ-
ವ್ಯಾಜೇನ ನೂನಮಭಯಾರ್ಥನಮಾತನೋತಿ --60
ಆಶ್ಚರ್ಯಮಮ್ಬ
ಮದನಾಭ್ಯುದಯಾವಲಮ್ಬಃ
ಕಾಮಾಕ್ಷಿ ಚಞ್ಚಲನಿರೀಕ್ಷಣವಿಭ್ರಮಸ್ತೇ|
ಧೈರ್ಯಂ ವಿಧೂಯ
ತನುತೇ ಹೃದಿ ರಾಗಬನ್ಧಂ
ಶಂಭೋಸ್ತದೇವ
ವಿಪರೀತತಯಾ ಮುನೀನಾಮ್ --61
ಜನ್ತೋಃ ಸಕೃತ್ಪ್ರಣಮತೋ
ಜಗದೀಡ್ಯತಾಂ ಚ
ತೇಜಸ್ವಿತಾಂ
ಚ ನಿಶಿತಾಂ ಚ ಮತಿಂ ಸಭಾಯಾಮ್|
ಕಾಮಾಕ್ಷಿ ಮಾಕ್ಷಿಕಝರೀಮಿವ ವೈಖರೀಂ ಚ
ಲಕ್ಷ್ಮೀಂ ಚ
ಪಕ್ಷ್ಮಲಯತಿ ಕ್ಷಣವೀಕ್ಷಣಂ ತೇ --62
ಕಾದಮ್ಬಿನೀ
ಕಿಮಯತೇ ನ ಜಲಾನುಷಙ್ಗಂ
ಭೃಙ್ಗಾವಲೀ ಕಿಮುರರೀಕುರುತೇ ನ ಪದ್ಮಮ್|
ಕಿಂ ವಾ ಕಲಿನ್ದತನಯಾ ಸಹತೇ ನ ಭಙ್ಗಂ
ಕಾಮಾಕ್ಷಿ ನಿಶ್ಚಯಪದಂ ನ ತವಾಕ್ಷಿಲಕ್ಷ್ಮೀಃ --63
ಕಾಕೋಲಪಾವಕತೃಣೀಕರಣೇಽಪಿ
ದಕ್ಷಃ
ಕಾಮಾಕ್ಷಿ ಬಾಲಕಸುಧಾಕರಶೇಖರಸ್ಯ|
ಅತ್ಯನ್ತಶೀತಲತಮೋ
ಽಪ್ಯನುಪಾರತಂ ತೇ
ಚಿತ್ತಂ ವಿಮೋಹಯತಿ
ಚಿತ್ರಮಯಂ ಕಟಾಕ್ಷಃ --64
ಕಾರ್ಪಣ್ಯಪೂರಪರಿವರ್ಧಿತಮಮ್ಬ ಮೋಹ-
ಕನ್ದೋದ್ಗತಂ
ಭವಮಯಂ ವಿಷಪಾದಪಂ ಮೇ|
ತುಙ್ಗಂ ಛಿನತ್ತು
ತುಹಿನಾದ್ರಿಸುತೇ ಭವತ್ಯಾಃ
ಕಾಞ್ಚೀಪುರೇಶ್ವರಿ
ಕಟಾಕ್ಷಕುಠಾರಧಾರಾ --65
ಕಾಮಾಕ್ಷಿ ಘೋರಭವರೋಗಚಿಕಿತ್ಸನಾರ್ಥ-
ಮಭ್ಯರ್ಥ್ಯ
ದೇಶಿಕಕಟಾಕ್ಷಭಿಷಕ್ಪ್ರಸಾದಾತ್|
ತತ್ರಾಪಿ ದೇವಿ
ಲಭತೇ ಸುಕೃತೀ ಕದಾಚಿ-
ದತ್ಯನ್ತದುರ್ಲಭಮಪಾಙ್ಗಮಹೌಷಧಂ
ತೇ --66
ಕಾಮಾಕ್ಷಿ ದೇಶಿಕಕೃಪಾಙ್ಕುರಮಾಶ್ರಯನ್ತೋ
ನಾನಾತಪೋನಿಯಮನಾಶಿತಪಾಶಬನ್ಧಾಃ|
ವಾಸಾಲಯಂ ತವ
ಕಟಾಕ್ಷಮಮುಂ ಮಹಾನ್ತೋ
ಲಬ್ಧ್ವಾ ಸುಖಂ
ಸಮಧಿಯೋ ವಿಚರನ್ತಿ ಲೋಕೇ --67
ಸಾಕೂತಸಂಲಪಿತಗರ್ಭಿತಮುಗ್ಧಹಾಸಂ
ವ್ರೀಡಾನುರಾಗಸಹಚಾರಿ
ವಿಲೋಕನಂ ತೇ|
ಕಾಮಾಕ್ಷಿ ಕಾಮಪರಿಪನ್ಥಿನಿ
ಮಾರವೀರ-
ಸಾಮ್ರಾಜ್ಯವಿಭ್ರಮದಶಾಂ
ಸಫಲೀಕರೋತಿ --68
ಕಾಮಾಕ್ಷಿ ವಿಭ್ರಮಬಲೈಕನಿಧಿರ್ವಿಧಾಯ
ಭ್ರೂವಲ್ಲಿಚಾಪಕುಟಿಲೀಕೃತಿಮೇವ
ಚಿತ್ರಮ್|
ಸ್ವಾಧೀನತಾಂ
ತವ ನಿನಾಯ ಶಶಾಙ್ಕಮೌಲೇ-
ರಙ್ಗಾರ್ಧರಾಜ್ಯಸುಖಲಾಭಮಪಾಙ್ಗವೀರಃ --69
ಕಾಮಾಂಕುರೈಕನಿಲಯಸ್ತವ
ದೃಷ್ಟಿಪಾತಃ
ಕಾಮಾಕ್ಷಿ ಭಕ್ತಮನಸಾಂ
ಪ್ರದದಾತಿ ಕಾಮಾನ್|
ರಾಗಾನ್ವಿತಃ ಸ್ವಯಮಪಿ
ಪ್ರಕಟೀಕರೋತಿ
ವೈರಾಗ್ಯಮೇವ ಕಥಮೇಷ ಮಹಾಮುನೀನಾಮ್ --70
ಕಾಲಾಮ್ಬುವಾಹನಿವಹೈಃ ಕಲಹಾಯತೇ ತೇ
ಕಾಮಾಕ್ಷಿ ಕಾಲಿಮಮದೇನ
ಸದಾ ಕಟಾಕ್ಷಃ |
ಚಿತ್ರಂ ತಥಾಪಿ
ನಿತರಾಮಮುಮೇವ ದೃಷ್ಟ್ವಾ
ಸೋತ್ಕಣ್ಠ ಏವ
ರಮತೇ ಕಿಲ ನೀಲಕಣ್ಠಃ --71
ಕಾಮಾಕ್ಷಿ ಮನ್ಮಥರಿಪುಂ
ಪ್ರತಿ ಮಾರತಾಪ-
ಮೋಹಾನ್ಧಕಾರಜಲದಾಗಮನೇನ
ನೃತ್ಯನ್|
ದುಷ್ಕರ್ಮಕಞ್ಚುಕಿಕುಲಂ
ಕಬಲೀಕರೋತು
ವ್ಯಾಮಿಶ್ರಮೇಚಕರುಚಿಸ್ತ್ವದಪಾಙ್ಗಕೇಕೀ --72
ಕಾಮಾಕ್ಷಿ ಮನ್ಮಥರಿಪೋರವಲೋಕನೇಷು
ಕಾನ್ತಂ ಪಯೋಜಮಿವ
ತಾವಕಮಕ್ಷಿಪಾತಮ್|
ಪ್ರೇಮಾಗಮೋ
ದಿವಸವದ್ವಿಕಚೀಕರೋತಿ
ಲಜ್ಜಾಭರೋ ರಜನಿವನ್ಮುಕುಲೀಕರೋತಿ --73
ಮೂಕೋ ವಿರಿಞ್ಚತಿ
ಪರಂ ಪುರುಷಃ ಕುರೂಪಃ
ಕಂದರ್ಪತಿ ತ್ರಿದಶರಾಜತಿ
ಕಿಂಪಚಾನಃ|
ಕಾಮಾಕ್ಷಿ ಕೇವಲಮುಪಕ್ರಮಕಾಲ
ಏವ
ಲೀಲಾತರಙ್ಗಿತಕಟಾಕ್ಷರುಚಃ
ಕ್ಷಣಂ ತೇ --74
ನೀಲಾಲಕಾ ಮಧುಕರನ್ತಿ
ಮನೋಜ್ಞನಾಸಾ-
ಮುಕ್ತಾರುಚಃ
ಪ್ರಕಟರೂಢಬಿಸಾಂಕುರನ್ತಿ |
ಕಾರುಣ್ಯಮಮ್ಬ
ಮಕರನ್ದತಿ ಕಾಮಕೋಟಿ
ಮನ್ಯೇ ತತಃ
ಕಮಲಮೇವ ವಿಲೋಚನಂ ತೇ --75
ಆಕಾಙ್ಕ್ಷ್ಯಮಾಣಫಲದಾನವಿಚಕ್ಷಣಾಯಾಃ
ಕಾಮಾಕ್ಷಿ ತಾವಕಕಟಾಕ್ಷಕಕಾಮಧೇನೋಃ
|
ಸಂಪರ್ಕ ಏವ
ಕಥಮಸ್ಯ ವಿಮುಕ್ತಪಾಶ-
ಬನ್ಧಾಃ ಸ್ಫುಟಂ
ತನುಭೃತಃ ಪಶುತಾಂ ತ್ಯಜನ್ತಿ --76
ಸಂಸಾರಘರ್ಮಪರಿತಾಪಜುಷಾಂ
ನರಾಣಾಂ
ಕಾಮಾಕ್ಷಿ ಶೀತಲತರಾಣಿ
ತವೇಕ್ಷಿತಾನಿ|
ಚನ್ದ್ರಾತಪನ್ತಿ
ಘನಚನ್ದನಕರ್ದಮನ್ತಿ
ಮುಕ್ತಾಗುಣನ್ತಿ
ಹಿಮವಾರಿನಿಷೇಚನನ್ತಿ --77
ಪ್ರೇಮಾಮ್ಬುರಾಶಿಸತತಸ್ನಪಿತಾನಿ
ಚಿತ್ರಂ
ಕಾಮಾಕ್ಷಿ ತಾವಕ
ಕಟಾಕ್ಷನಿರೀಕ್ಷಣಾನಿ|
ಸಂಘುಕ್ಷಯನ್ತಿ
ಮುಹುರಿನ್ಧನರಾಶಿರೀತ್ಯಾ
ಮಾರದ್ರುಹೋ
ಮನಸಿ ಮನ್ಮಥಚಿತ್ರಭಾನುಮ್ --78
ಕಾಲಾಞ್ಜನಪ್ರತಿಭಟಂ
ಕಮನೀಯಕಾನ್ತ್ಯಾ
ಕನ್ದರ್ಪತನ್ತ್ರಕಲಯಾ
ಕಲಿತಾನುಭಾವಮ್|
ಕಾಞ್ಚೀವಿಹಾರರಸಿಕೇ
ಕಲುಷಾರ್ತಿಚೋರಂ
ಕಾಲ್ಲೋಲಯಸ್ವ
ಮಯಿ ತೇ ಕರುಣಾಕಟಾಕ್ಷಮ್ --79
ಕ್ರಾನ್ತೇನ
ಮನ್ಮಥಮದೇನ ವಿಮೋಹ್ಯಮಾನ-
ಸ್ವಾನ್ತೇನ
ಚೂತತರುಮೂಲಗತಸ್ಯ ಪುಂಸಃ|
ಕಾನ್ತೇನ ಕಿಂಚಿದವಲೋಕಯ
ಲೋಚನಸ್ಯ
ಪ್ರಾನ್ತೇನ
ಮಾಂ ಜನನಿ ಕಾಞ್ಚಿಪುರೀವಿಭೂಷೇ --80
ಕಾಮಾಕ್ಷಿ ಕೋಽಪಿ
ಸುಜನಾಸ್ತ್ವದಪಾಙ್ಗಸಂಗೇ
ಕಣ್ಠೇನ ಕನ್ದಲಿತಕಾಲಿಮಸಂಪ್ರದಾಯಾಃ|
ಉತ್ತಂಸಕಲ್ಪಿತಚಕೋರಕುಟುಂಬಪೋಷಾ
ನಕ್ತಂದಿವಪ್ರಸವಭೂನಯನಾ
ಭವನ್ತಿ --81
ನೀಲೋತ್ಪಲಪ್ರಸವಕಾನ್ತಿನಿದರ್ಶನೇನ
ಕಾರುಣ್ಯವಿಭ್ರಮಜುಷಾ
ತವ ವೀಕ್ಷಣೇನ|
ಕಾಮಾಕ್ಷಿ ಕರ್ಮಜಲಧೇಃ
ಕಲಶೀಸುತೇನ
ಪಾಶತ್ರಯಾದ್ವಯಮಮೀ
ಪರಿಮೋಚನೀಯಾಃ --82
ಅತ್ಯನ್ತಚಞ್ಚಲಮಕೃತ್ರಿಮಮಞ್ಜನಂ
ಕಿಂ
ಝಙ್ಕಾರಭಙ್ಗಿರಹಿತಾ
ಕಿಮು ಭೃಙ್ಗಮಾಲಾ |
ಧೂಮಾಙ್ಕುರಃ
ಕಿಮು ಹುತಾಶನಸಂಗಹೀನಾ
ಕಾಮಾಕ್ಷಿ ನೇತ್ರರುಚಿನೀಲಿಮಕನ್ದಲೀ
ತೇ --83
ಕಾಮಾಕ್ಷಿ ನಿತ್ಯಮಯಮಞ್ಜಲಿರಸ್ತು
ಮುಕ್ತಿ-
ಬೀಜಾಯ ವಿಭ್ರಮಮದೋದಯಘೂರ್ಣಿತಾಯ|
ಕನ್ದರ್ಪದರ್ಪಪುನರುದ್ಭವಸಿದ್ಧಿದಾಯ
ಕಲ್ಯಾಣದಾಯ
ತವ ದೇವಿ ದೃಗಞ್ಚಲಾಯ --84
ದರ್ಪಾಂಕುರೋ
ಮಕರಕೇತನವಿಭ್ರಮಾಣಾಂ
ನಿನ್ದಾಂಕುರೋ
ವಿದಲಿತೋತ್ಪಲಚಾತುರೀಣಾಮ್|
ದೀಪಾಂಕುರೋ
ಭವತಮಿಸ್ರಕದಮ್ಬಕಾನಾಂ
ಕಾಮಾಕ್ಷಿ ಪಾಲಯತು
ಮಾಂ ತ್ವದಪಾಙ್ಗಪಾತಃ --85
ಕೈವಲ್ಯದಿವ್ಯಮಣಿರೋಹಣಪರ್ವತೇಭ್ಯಃ
ಕಾರುಣ್ಯನಿರ್ಝರಪಯಃಕೃತಮಜ್ಜನೇಭ್ಯಃ
|
ಕಾಮಾಕ್ಷಿ ಕಿಂಕರಿತಶಂಕರಮಾನಸೇಭ್ಯ-
ಸ್ತೇಭ್ಯೋ ನಮೋಽಸ್ತು
ತವ ವೀಕ್ಷಣವಿಭ್ರಮೇಭ್ಯಃ --86
ಅಲ್ಪೀಯ ಏವ
ನವಮುತ್ಪಲಮಮ್ಬ ಹೀನಾ
ಮೀನಸ್ಯ ವಾ
ಸರಣಿರಮ್ಬುರುಹಾಂ ಚ ಕಿಂ ವಾ|
ದೂರೇ ಮೃಗೀದೃಗಸಮಞ್ಜಸಮಞ್ಜನಂ
ವಾ
ಕಾಮಾಕ್ಷಿ ವೀಕ್ಷಣರುಚೌ
ತವ ತರ್ಕಯಾಮಃ --87
ಮಿಶ್ರೀಭವದ್ಗರಲಪಙ್ಕಿಲಶಂಕರೋರಃ-
ಸೀಮಾಙ್ಗಣೇ
ಕಿಮಪಿ ರಿಙ್ಗಣಮಾದಧಾನಃ|
ಹೇಲಾವಧೂತಲಲಿತಶ್ರವಣೋತ್ಪಲೋಽಸೌ
ಕಾಮಾಕ್ಷಿ ಬಾಲ
ಇವ ರಾಜತಿ ತೇ ಕಟಾಕ್ಷಃ --88
ಪ್ರೌಢೀಕರೋತಿ
ವಿದುಷಾಂ ನವಸೂಕ್ತಿಧಾಟೀ-
ಚೂತಾಟವೀಷು
ಬುಧಕೋಕಿಲಲಾಲ್ಯಮಾನಮ್|
ಮಾಧ್ವೀರಸಂ
ಪರಿಮಲಂ ಚ ನಿರರ್ಗಲಂ ತೇ
ಕಾಮಾಕ್ಷಿ ವೀಕ್ಷಣವಿಲಾಸವಸನ್ತಲಕ್ಷ್ಮೀಃ --89
ಕೂಲಂಕಷಂ ವಿತನುತೇ
ಕರುಣಾಮ್ಬುವರ್ಷೀ
ಸಾರಸ್ವತಂ ಸುಕೃತಿನಃ
ಸುಲಭಂ ಪ್ರವಾಹಮ್|
ತುಚ್ಛೀಕರೋತಿ
ಯಮುನಾಮ್ಬುತರಙ್ಗಭಙ್ಗೀಂ
ಕಾಮಾಕ್ಷಿ ಕಿಂ
ತವ ಕಟಾಕ್ಷಮಹಾಮ್ಬುವಾಹಃ --90
ಜಾಗರ್ತಿ ದೇವಿ
ಕರುಣಾಶುಕಸುನ್ದರೀ ತೇ
ತಾಟಙ್ಕರತ್ನರುಚಿದಾಡಿಮಖಣ್ಡಶೋಣೇ
|
ಕಾಮಾಕ್ಷಿ ನಿರ್ಭರಕಟಾಕ್ಷಮರೀಚಿಪುಞ್ಜ-
ಮಾಹೇನ್ದ್ರನೀಲಮಣಿಪಞ್ಜರಮಧ್ಯಭಾಗೇ --91
ಕಾಮಾಕ್ಷಿ ಸತ್ಕುವಲಯಸ್ಯ
ಸಗೋತ್ರಭಾವಾ-
ದಾಕ್ರಾಮತಿ
ಶ್ರುತಿಮಸೌ ತವ ದೃಷ್ಟಿಪಾತಃ|
ಕಿಂ ಚ ಸ್ಫುಟಂ
ಕುಟಿಲತಾಂ ಪ್ರಕಟೀಕರೋತಿ
ಭ್ರೂವಲ್ಲರೀಪರಿಚಿತಸ್ಯ
ಫಲಂ ಕಿಮೇತತ್ --92
ಏಷಾ ತವಾಕ್ಷಿಸುಷಮಾ
ವಿಷಮಾಯುಧಸ್ಯ
ನಾರಾಚವರ್ಷಲಹರೀ
ನಗರಾಜಕನ್ಯೇ|
ಶಙ್ಕೇ ಕರೋತಿ
ಶತಧಾ ಹೃದಿ ಧೈರ್ಯಮುದ್ರಾಂ
ಶ್ರೀಕಾಮಕೋಟಿ
ಯದಸೌ ಶಿಶಿರಾಂಶುಮೌಲೇಃ --93
ಬಾಣೇನ ಪುಷ್ಪಧನುಷಃ
ಪರಿಕಲ್ಪ್ಯಮಾನ-
ತ್ರಾಣೇನ ಭಕ್ತಮನಸಾಂ
ಕರುಣಾಕರೇಣ|
ಕೋಣೇನ ಕೋಮಲದೃಶಸ್ತವ
ಕಾಮಕೋಟಿ
ಶೋಣೇನ ಶೋಷಯ
ಶಿವೇ ಮಮ ಶೋಕಸಿನ್ಧುಮ್ --94
ಮಾರದ್ರುಹಾ
ಮುಕುಟಸೀಮ್ನಿ ಲಾಲ್ಯಮಾನೇ
ಮನ್ದಾಕಿನೀಪಯಸಿ
ತೇ ಕುಟಿಲಂ ಚರಿಷ್ಣುಃ|
ಕಾಮಾಕ್ಷಿ ಕೋಪರಭಸಾದ್ವಲಮಾನಮೀನ-
ಸನ್ದೇಹಮಙ್ಕುರಯತಿ
ಕ್ಷಣಮಕ್ಷಿಪಾತಃ --95
ಕಾಮಾಕ್ಷಿ ಸಂವಲಿತಮೌಕ್ತಿಕಕುಣ್ಡಲಾಂಶು-
ಚಞ್ಚತ್ಸಿತಶ್ರವಣಚಾಮರಚಾತುರೀಕಃ
ಸ್ತಮ್ಭೇ ನಿರನ್ತರಮಪಾಙ್ಗಮಯೇ
ಭವತ್ಯಾ
ಬದ್ಧಶ್ಚಕಾಸ್ತಿ
ಮಕರಧ್ವಜಮತ್ತಹಸ್ತೀ --96
ಯಾವತ್ಕಟಾಕ್ಷರಜನೀಸಮಯಾಗಮಸ್ತೇ
ಕಾಮಾಕ್ಷಿ ತಾವದಚಿರಾನ್ನಮತಾಂ
ನಾರಾಣಾಮ್|
ಆವಿರ್ಭವತ್ಯಮೃತದೀಧಿತಿಬಿಮ್ಬಮಮ್ಬ
ಸಂವಿನ್ಮಯಂ
ಹೃದಯಪೂರ್ವಗಿರೀನ್ದ್ರಶೃಙ್ಗೇ --97
ಕಾಮಾಕ್ಷಿ ಕಲ್ಪವಿಟಪೀವ
ಭವತ್ಕಟಾಕ್ಷೋ
ದಿತ್ಸುಃ ಸಮಸ್ತವಿಭವಂ
ನಮತಾಂ ನರಾಣಾಮ್|
ಭೃಙ್ಗಸ್ಯ ನೀಲನಲಿನಸ್ಯ
ಚ ಕಾನ್ತಿಸಂಪ-
ತ್ಸರ್ವಸ್ವಮೇವ
ಹರತೀತಿ ಪರಂ ವಿಚಿತ್ರಮ್ --98
ಅಜ್ಞಾತಭಕ್ತಿರಸಮಪ್ರಸರದ್ವಿವೇಕ-
ಮತ್ಯನ್ತಗರ್ವಮನಧೀತಸಮಸ್ತಶಾಸ್ತ್ರಮ್|
ಅಪ್ರಾಪ್ತಸತ್ಯಮಸಮೀಪಗತಂ
ಚ ಮುಕ್ತೇಃ
ಕಾಮಾಕ್ಷಿ ನೈವ
ತವ ಕಾಂಕ್ಷತಿ ದೃಷ್ಟಿಪಾತಃ --99
ಅತ್ಯನ್ತಶೀತಲಮನರ್ಗಲಕರ್ಮಪಾಕ-
ಕಾಕೋಲಹಾರಿ
ಸುಲಭಂ ಸುಮನೋಭಿರೇತತ್|
ಪೀಯೂಷಮೇವ ತವ
ವೀಕ್ಷಣಮಮ್ಬ ಕಿಂ ತು
ಕಾಮಾಕ್ಷಿ ನೀಲಮಿದಮಿತ್ಯಯಮೇವ
ಭೇದಃ --100
ಪಾತೇನ ಲೋಚನರುಚೇಸ್ತವ
ಕಾಮಕೋಟಿ
ಪೋತೇನ ಪಾತಕಪಯೋಧಿಭಯಾತುರಾಣಾಮ್
|
ಪೂತೇನ ತೇನ
ನವಕಾಞ್ಚನಕುಣ್ಡಲ್ಲಾಂಶು-
ವೀತೇನ ಶೀತಲಯ
ಭೂಧರಕನ್ಯಕೇ ಮಾಮ್ --101
ಯೆತತ್
ಕತಾಕ್ಶ ಶತಕಂ ಕನಸಾರ ರಮ್ಯಂ
ಭಕ್ತ್ಯಾಸ
ಕ್ರುತ್ ಪಟತಿಯ:ಕ್ರುತ ನಿತ್ಯ ಕರ್ಮಾ
ತಸ್ಮೈ
ಪ್ರಸೀದ ದಿದರಾಂ ಕಿಲ ಕಾಮಕೊಟಿ:
ದರ್ಮಾತ
ಕಾಮ ಮದುಲಂ ಪರಮನ್ಜ ಸೌಕ್ಯಂ --102
